Psa 79 | MEU | STEP | Dirava e, bese idau-idau ese oi ahumu vada e abia, emu dubu helaḡana vada e hamiroa, Ierusalem vada e ḡiḡia dobi.

Psalms 79

1 Dirava e, bese idau-idau ese oi ahumu vada e abia,
emu dubu helaḡana vada e hamiroa,
Ierusalem vada e ḡiḡia dobi.
2 Emu hesiai taudia tau-anidia na
atai manudia vada e henidia, adia;
emu helaḡa taudia hidiodia na
tanobada boromadia vada e henidia.
3 Raradia vada e hahebubua, ranu heḡereḡerena, Ierusalem heḡeḡemadai ai,
asi tauna ta noho, idia baine guridia.
4 Dekemai taudia ese e ihi-ihiraimaimu,
e ḡeḡemai daemu taudia ese e ḡonaḡonalaimaimu,
bona e kirikirilaimaimu.
5 Iehova e, ba badu henimai ela bona edena nega ai? Ela hanaihanai a?
Emu vaḡeḡe baine ara lahi na heto a?
6 Asia dibamu besedia latadiai emu badu ba seia dobi,
oi ladamu asie hahaneamu basileiadia latadiai danu;
7 badina be idia ese Iakob vada e ania ore,
ena noho gabuna vada e havahua.

8 Senemai edia kara havara na basio lalo tao, ai ihadikalaimai;
emu hebogahisi baine mai henimai haraḡa,
badina be ai na vada ame baia.
9 Ihamaurimai Diravana e, ba kahamai,
oi ladamu hairaina bagunai;
ba hamaurimai bona emai dika ba gwau tao,
oi ladamu dainai.
10 Anina be dahaka bese idau-idau baeto
“Edia Dirava be edeseni ai?”
Emu hesiai taudia raradia e hebubu idavalaidia na
bese idau-idau bae diba,
ai vairamai ai.

11 Iḡui taudia edia ḡanaḡana na oiemu ai baine dae;
vada e revadia mase taudia na oi siahumu badana amo ba hamauridia.
12 Ḡaubada e, ai dekemai taudia latadiai
oi vada e ihi-ihiraimu taudia edia heihi-ihirai na
nega hahitu ba halou henidia;
13 bena ai, emu bese taudia, emu seri mamoedia,
baia imodaimu hanaihanai;
uru ta ela bona ma uru ta
oi ihanamomu baia gwaurai hesiriu-hesiriu.